Halló halló,

það er aldeilis! Núna er ég bara orðinn rosa stór strákur og byrjaður hjá dagmömmu. Hún heitir Jóa og passaði Úlf frænda áður en hann byrjaði á leikskóla. Mér finnst bara gaman að hitta krakkana og leika við þá.

Ég er líka kominn með tvær nýjar tennur. Báðar augntennurnar uppi eru komnar í gegn. Eflaust einhverjar fleiri á leiðinni.

Berti frændi minn er búinn að vera í heimsókn frá Danmörku, fyrst hann og Eva, dóttir hans, og svo komu líka Inga, mamma Evu, og Audrius bróðir hennar. Þau eru skemmtileg.

Svo eignaðist ég nýja frænku þegar Elva frænka og Stígur frændi eignuðust dóttur. Hún heitir Rán og er ofsalega sæt. Úlfur bara orðinn stóri bróðir og ég ekki lengur minnstur í fjölskyldunni.

Margt búið að gerast en hvað er að frétta af ykkur?

Kveðja,
Frosti

Halló!

Sjáiði hvað ég á fínan fána. Þýðir ekkert annað en að vera þjóðlegur þegar vel gengur. Fótboltastrákarnir unnu og Magni er bestur. Og svona. Svo eru komnar nýjar myndir. Ég fór í heimsókn í Suðurásinn og hitti Nadíu Sól og Huldu og Ásdísi og Kára og auðvitað ömmu og afa. Svo fékk ég líka mjólkurkex og fór í bað og allt bara.

Bið að heilsa.
Kveðja,
Frosti.

Pabbi klaufi gleymdi einni möppu af myndum þegar hann var að setja nýju myndirnar inn í albúmið. Hann er núna búinn að bæta úr því og setja inn annað myndaalbúm með 25 myndum í viðbót af mér að borða gulrætur og svona. Skoðið þær endilega líka og segið mér hvað ykkur finnst.

Kveðja,
Frosti

Halló halló!

Það er nú ýmislegt búið að gerast síðan síðast. Ég fór í læknisskoðun og var þá orðinn 10 kg og 850 grömm og 73 cm. Ég fékk líka sprautu í rassinn, það var ekki gott. Ég var samt ekki lengi að jafna mig á henni enda svo stór og duglegur.

Svo erum við öll búin að vera lasin. Mamma og pabbi fengu leiðinlega flensu og ég er búinn að vera kvefaður síðustu daga og með einhverja smá pest. Ég brosi samt alltaf og reyni að vera hress. Þýðir ekkert annað.

Ég sá líka Magna í sjónvarpinu að syngja. Mér fannst hann langbestur og byrjaði strax að syngja með honum og dansa á fullu. Ef mamma og pabbi myndu leyfa mér að vaka þá myndi ég sko þokkalega horfa á hann í nótt og kjósa hann. Ég verð bara að horfa á endursýninguna og vona að allir hinir verði duglegir að kjósa hann. Áfram Magni!

Í gær fór ég í fyrstu klippinguna mína. Mamma rakaði fullt af hári af hausnum á mér með skrýtnu græjunni sinni. Núna er ég næstum alveg snoðaður.

Þið getið skoðað myndir af þessu, það eru komnar 150 nýjar myndir í myndaalbúmið mitt.

Segið mér endilega hvað er að frétta af ykkur.

Kveðja,
Frosti

Það er komin upp önnur vinnukona!  Af því tilefni fékk ég tannbursta og þótt það hafi verið skrítið að bursta fyrst finnst mér það mjög gott núna. Bursta meira að segja sjálfur stundum! Ég er ennþá mjög pirraður í gómnum,svo það verður líklega ekki langt í næstu tönn.
Svo er ég farinn að fá mjólkurkex að naga einstaka sinnum. Það er samt varla að mamma þori að gefa mér svoleiðis því ég er svo voðalega duglegur að bíta að oft næ ég stórum bita úr kexinu áður en það blotnar! Mamma vill nú ekki að það fari að standa í mér svo hún er frekar óróleg með þetta. Svo fékk ég soðna kartöflu með gulrótarmauki í kvöldmat í gær og það fannst mér algjört nammi. Ég ljóma líka allur þegar ég sé grautarskál nálægt mér, þá veit ég sko alveg hvað er að gerast!
Pabbi er búinn í fæðingarorlofinu sínu og farinn að vinna í löndun. Hann var að vinna rosalega lengi þrjá daga í röð og ég sá hann lítið. Þegar hann kom svo heim í dag var ég búinn að vera mjög pirraður, enda slappur í maganum og klæjaði líka í góminn. En þegar ég sá pabba varð ég svo glaður og lék á alls oddi. Greinilega búinn að sakna pabba,enda er hann bestur. Við erum samt voða ánægð með þessa nýju vinnu því pabbi fær svo góð frí inn á milli sem hann getur notað til að dúllast með okkur mömmu
Núna í augnablikinu er ég uppi í Suðurás með pabba. Mamma er ein heima því hún er lasin, svo hún ákvað að ritarast smá og skella inn nýjum myndum. Þær eru mjög flottar þótt ég segi sjálfur frá Endilega kíkið.

Helgarkveðja, Frosti ofurtannburstari.

Ég og Ólína stóra frænka mín,sem var alveg rosalega dugleg að passa mig

Af mér er allt gott að frétta. Fór í skoðun í gær og sprautu. Ég er orðin 10 kíló og 150 grömm og heilir 70 cm! Stór strákur.
Svo er komin upp ein lítil tönnsla! Mamma fann hana á föstudagskvöld og nú verður hún sko að gefa mér tannfé..jei!
Það var rosalega gaman á Ólafsfirði eins og þið getið séð á myndunum. Gaman að hitta allt fólkið og fara í gönguferðir í bænum. Við mamma og pabbi erum sko alveg sammála um að fara aftur sem fyrst og að gera blúshátíðarferð að árlegri uppákomu hjá okkur. Við viljum bara þakka Guðnýju stórfrænku og Ægi fyrir allt saman og auðvitað Ásdísi Maríu fyrir að lána okkur herbergið sitt. Knús til ykkar allra!

Halló allir!

Í dag á ég afmæli. Ég er orðinn svo rosalega stór, alveg 5 mánaða í dag. Ég ætla að eyða deginum í að syngja afmælissönginn minn, bæði í Jórufellinu og líka í Suðurásnum. Svo fæ ég vonandi eitthvað gott að borða á afmælisdaginn, búinn að fá graut og fæ vonandi banana eða bananamauk í kvöld. Maður verður nú að leyfa sér eitthvað á afmælisdaginn sinn.

Á morgun ætlum við svo í laaaangan bíltúr, alla leið norður í Eyjafjörð. Ég ætla að heimsækja ættingja bæði á Akureyri og Ólafsfirði. Það verður gaman.

Munið svo að skoða myndirnar mínar og segja hvað ykkur finnst.

Kveðja,
Frosti

Úlfur og Frosti sætir saman

Það er sko margt búið að vera í gangi hjá mér síðustu daga. Við mamma og pabbi fórum upp í sveit og vorum í viku. Það var rosalega gaman. Ég fékk að leika við strákana og skoða hundana á bænum. Svo voru auðvitað allir að knúsa mig,enda er ég svo knúsulegur. Mamma var síðan að vinna og á meðan brölluðum við pabbi ýmislegt saman. Við fylgjumst auðvitað með HM og svona, og er ég mjög áhugasamur um boltann, enda er svo margt að gerast og flottir litir á vellinum.
Eins og þið sjáið á myndinni er ég orðinn svo stór! Það eru 15 mánuðir á milli okkar Úlfs en ég virðist ætla að stefna á að ná honum sem fyrst. Mamma er ekki alveg að ná þessu,litla barnið hennar bara stækkar og stækkar! Enda er ég svo duglegur að borða.
Það er komið inn nýtt albúm með alveg fullt af myndum, eitthvað um 200 stykki..mamma og pabbi virðast ekki vera að róast í myndabrjálæðinu
Nú er pabbi kominn í mánaðarfrí og við ætlum sko að hafa það gott litla fjölskyldan. Í næstu viku ætlum við svo að fara norður til Ólafsfjarðar. Það verður nú gaman, fullt af skemmtilegu fólki og svona.
Verið svo endilega í bandi, við ætlum að vera dugleg að rölta niður í bæ þegar það er gott veður, þannig að ef þið viljið koma með í ísferð á Austurvöll þá látið þið bara heyra í ykkur.

Kveðja, Frosti stóri strákur.

Hæ! Það eru komnar inn nýjar myndir. Meiri fréttir fljótlega.

Kveðja, Frosti.